عزيزي أزاد ..
كنت ماشي بالحديقة على بكرة الصبح بنور الله لا إلي ولاعلي، على أساس عم بعمل مشي رياضي، طبعاً جهلة الأربعين بتقتضي أنو واحدنا يدوب كرشه شوي ..ماعلينا.. وإذ بإبريق شاي مجعلك مرمي بنص الطريق وعم بيقلي: شوطني أعطني تسديدة أرضية تعلو العارضة بقليل. على رأي وجيه شويكي قدّس الله سره ..
ولسا مانزلت رجلي عالأرض بعد التسديدة العظيمة إلا ورأيت يا أزاد مارداً طويلاً عريضاً.. وعلى شبيك.. لبيك.. كذا كذا بين إيديك...
وبعد تجاوز الرعبة والمقدمة المعتادة اللي بتشوفها بالأفلام والمسلسلات بعد كل مارد، اجتمعت مع نفسي اجتماعاً سريعاً، بتعرف واحدنا بيحتار بهيك مواقف شو يتمنى وشو يطلب، الواحد مو كل يوم بيلتقى مع مارد..
المهم أول شغلة خطرت لي كوني من مؤيدي المرأة وحقوقها أنو أطلب منه يجوزني مرة تانية فوق مرتي.. ترى شوف أنا بحبها لمرتي، ويحب ناقتها بعيري، وبدوب فيها تقبر عضامي، بس يا أزاد كل يوم فروج فروج فروج.. يعني بيصير يوم فروج.. يوم شي تاني.. وفي حال وافق المارد على تكملة النصاب بيصير يوم فروج.. يوم لحم ضاني.. يوم حلويات.. ويوم مرطبات.. المهم قلت له للمارد شوف يا أبوي بدي مرة سمرة.. لأ استنى شقرة.. على مهلك.. حنطية آخر كلام.. شعرها جعد يعني طعج.. لأ سبل سبل ولماع.. لأ خيو بدي ياه مخوتم متل أميرات العصور الوسطى خلقة ربه..
شفايفها متل جوليا روبرتس وصدرها متل شارون ستون وطولها متل نعومي كامبل.. وعلى ذكر نعومي.. والله الغامق حلو كنت ناسيه يعني سواد على اسنان لولو.. وملامح منمنمة.. ولي ولي ولي بتشعل متل فحم الأركيلة..
ولا اقلك أجل لي موضوع النسوان.. بده صفنة..
طبعاً المارد حسيته مل وبلش يتطلع بالسما وحسيته بده يملص.. قلت له: معلم ريح حالك شوي واقعد على شي شجرة بالحديقة.. قال لي: مليت.. صارلي 100 سنة بقلب القمقم، من كم شهر شلفوني قصدي شلفوا القمقم مع شوية ألمنيوم مكسر وبعدين رحنا عالفرن دوبوني قصدي دوبوا القمقم الله لايوفقهم.. انشويت.. دخت.. وبعدين دخلوني بماكينة سكب طلعت ابريق شاي رقيق انكسرت إيده، بعد يومين رجعوا شلفوني.. قصدي شلفوا الابريق بهالزبالة.. انو هالبنت الحـرام صاحبة البيت شي مرة تفرك هالإبريق لحتى أطلع.. عبث.. مالك بالطويلة تبهدلت لجيت حضرتك.. ومن عزم شوطتك او رفستك طلعت.. المهم قلي شو بدك بدي اروح..
ـ شو بك مستعجل.. صحيح كم امنية بيطلعلي؟!..
ـ أمنية وحدة ياحبيب.. بقى قل لي.. شو بدك لأمشي..
فكرت.. فكرت.. فكرت.. فكرت.. فكرت.. العمى شو ممكن الواحد يطلب بأمنية وحدة.. شو ممكن تكون الأمنية يا أزاد .. شو رأيك أبعت لك المارد.. ساعتها رح يبصملك بالعشرة أنو واحدنا بده عمرين فوق عمره ليعرف شو بده ...
بيكس نافياني - قامشلو
كنت ماشي بالحديقة على بكرة الصبح بنور الله لا إلي ولاعلي، على أساس عم بعمل مشي رياضي، طبعاً جهلة الأربعين بتقتضي أنو واحدنا يدوب كرشه شوي ..ماعلينا.. وإذ بإبريق شاي مجعلك مرمي بنص الطريق وعم بيقلي: شوطني أعطني تسديدة أرضية تعلو العارضة بقليل. على رأي وجيه شويكي قدّس الله سره ..
ولسا مانزلت رجلي عالأرض بعد التسديدة العظيمة إلا ورأيت يا أزاد مارداً طويلاً عريضاً.. وعلى شبيك.. لبيك.. كذا كذا بين إيديك...
وبعد تجاوز الرعبة والمقدمة المعتادة اللي بتشوفها بالأفلام والمسلسلات بعد كل مارد، اجتمعت مع نفسي اجتماعاً سريعاً، بتعرف واحدنا بيحتار بهيك مواقف شو يتمنى وشو يطلب، الواحد مو كل يوم بيلتقى مع مارد..
المهم أول شغلة خطرت لي كوني من مؤيدي المرأة وحقوقها أنو أطلب منه يجوزني مرة تانية فوق مرتي.. ترى شوف أنا بحبها لمرتي، ويحب ناقتها بعيري، وبدوب فيها تقبر عضامي، بس يا أزاد كل يوم فروج فروج فروج.. يعني بيصير يوم فروج.. يوم شي تاني.. وفي حال وافق المارد على تكملة النصاب بيصير يوم فروج.. يوم لحم ضاني.. يوم حلويات.. ويوم مرطبات.. المهم قلت له للمارد شوف يا أبوي بدي مرة سمرة.. لأ استنى شقرة.. على مهلك.. حنطية آخر كلام.. شعرها جعد يعني طعج.. لأ سبل سبل ولماع.. لأ خيو بدي ياه مخوتم متل أميرات العصور الوسطى خلقة ربه..
شفايفها متل جوليا روبرتس وصدرها متل شارون ستون وطولها متل نعومي كامبل.. وعلى ذكر نعومي.. والله الغامق حلو كنت ناسيه يعني سواد على اسنان لولو.. وملامح منمنمة.. ولي ولي ولي بتشعل متل فحم الأركيلة..
ولا اقلك أجل لي موضوع النسوان.. بده صفنة..
طبعاً المارد حسيته مل وبلش يتطلع بالسما وحسيته بده يملص.. قلت له: معلم ريح حالك شوي واقعد على شي شجرة بالحديقة.. قال لي: مليت.. صارلي 100 سنة بقلب القمقم، من كم شهر شلفوني قصدي شلفوا القمقم مع شوية ألمنيوم مكسر وبعدين رحنا عالفرن دوبوني قصدي دوبوا القمقم الله لايوفقهم.. انشويت.. دخت.. وبعدين دخلوني بماكينة سكب طلعت ابريق شاي رقيق انكسرت إيده، بعد يومين رجعوا شلفوني.. قصدي شلفوا الابريق بهالزبالة.. انو هالبنت الحـرام صاحبة البيت شي مرة تفرك هالإبريق لحتى أطلع.. عبث.. مالك بالطويلة تبهدلت لجيت حضرتك.. ومن عزم شوطتك او رفستك طلعت.. المهم قلي شو بدك بدي اروح..
ـ شو بك مستعجل.. صحيح كم امنية بيطلعلي؟!..
ـ أمنية وحدة ياحبيب.. بقى قل لي.. شو بدك لأمشي..
فكرت.. فكرت.. فكرت.. فكرت.. فكرت.. العمى شو ممكن الواحد يطلب بأمنية وحدة.. شو ممكن تكون الأمنية يا أزاد .. شو رأيك أبعت لك المارد.. ساعتها رح يبصملك بالعشرة أنو واحدنا بده عمرين فوق عمره ليعرف شو بده ...
بيكس نافياني - قامشلو
