معاني مبطنة

[كول نار]

​

 بيعين الله: تقال لإنسان ما بيهمك أمره و لا بيهمك الله عانه ولا أخذه
 طول بالك: تقال لإنسان طالعة روحه و مش ممكن أبدا يطول باله
 الله يعين الناس: تقال لإنسان قرفان من كل الناس و نفسه الله يوخذ الناس
 هلا حبيبي: تقال لإنسان انت قرفان منه و لا هو حبيبك و لا نفسك ترحب فيه اصلا
 وينك زمان ما شفناك : تقال لإنسان ما الك نفس تشوفه بس عشان ما يسبقك بنفس السؤال
 وين أيامك: يقولها إنسان بده يضيع وقت بأي سؤال و هاذ اللي طلع معاه
 شو في ما في؟: تقال لإنسان شفته صدفة و ما بدك يفتح لك قصة حياته
 خلينا نشوفك: تقال لإنسان ما الك خاطر تشوفه او على الاقل بدك تخليه يحل عنك حاليا
 على راسي: تقال لإنسان انت شايفة حشرة بس بدك تختصر بالحكي معاه
 عندي: يقولها إنسان بده يصلح بأي طريقة و عادة إذا صار اشي بيصير فجأة "مو عنده" بل "عند عمك طحنا"
 ولا إشي! : يقولها إنسان مذهول و منصعق و خافف عقله و معتبر اللي قدامه "اشي" و "اشي كبير" كمان، عادة تستعمل للغزل
 كيف حالك إنت؟: تقال لإنسان مش عشان تطمئن على أخباره بل عشان توريه انك مفكره سكران أو دايخ لأنه كلامه مش كلام ناس عاقلين
 بدك الصحيح والا ابن عمه: يقولها إنسان كذاب و عمره ما حكى إلا "ابن عمه"
 شو بدك بطول السيرة: يقولها إنسان طويل بال و أقل قصة بيحكيها بدها إجازة أمومة 3 شهور عشان تسمعها كاملة
 انت لسا ما بتعرفني: تقال لإنسان فعلا ما بيعرفك بس نفسه ما يعرفك او مش فارقة معه إنه يعرفك
 لا تواخذني بهالكلمة: يقولها إنسان بده يحكي كلام يسطحك و يعل قلبك
 أنا والله مو فارقة معي: يقولها إنسان كذاب و شغل حكي لكنه بده يبدأ بتخويفك قبل ضربك،
لها استعمال ثاني و هو: يقولها إنسان فارقة معه و قاتل حاله عالشي اللي بيناقش فيه مع انه شي تافه، مثل الانسان اللي بيقيم الدنيا و بيقعدها في الباص عشان الكنترول يرجع له قرشين باقي
 ولو؟ على حسابك: تقال لإنسان بده ياخذ شي غصبن عنك (تخجيل يعني) أو بده ياخذ شي مش الك أصلا و تقال بدون نفس و يكون صاحبها منتظرا الرد: حبيبي الله يسعدك​